சூப்பர் ஸ்டாரின் அதிரடி 20:20 இறுதி பாகம்

12.எங்கேயோ கேட்ட குரல் - 14.08.1982

மீண்டுமொரு முறை பஞ்சு அருணாசலம், எஸ்.பி.முத்துராமன், ரஜினிகாந்த் அவர்கள் கூட்டணியில் வெளிவந்த கதைக்கு முக்கியத்துவம் கொடுத்து எடுக்கப்பட்ட படம்.. ரஜினி, அம்பிகா, ராதா இணைந்து நடித்த படம்... ரஜினி அவர்களின் அமைதியான நடிப்பு பெரிதும் பேசப்பட்டது... அதே நாளில் பஞ்சு அருணாசலம், எஸ்.பி.முத்துராமன்., கமல் கூட்டணியில் வெளிவந்த ஒரு மசாலா படம் பட்டையை கிளப்பியது... அது “சகலகலா வல்லவன்”.

13. மூன்று முகம் – 01.10.1982

மூன்று வேடங்களில் மூன்று முகமாய் மிகவும் வித்தியாசமான நடிப்பின் பரிமாணங்களை காட்டினார். துறவறம் பூண்டு தொடங்கும் பாந்தமான காமெடி நடிப்பு, பின் பொறி பறக்கும் அலெக்ஸ் பாண்டியன் என பரிமளித்து பின் பகுதியில் ஜான் என கலக்கிய படம். இதுவே பின்னர் ஹிந்தியில் "ஜான் ஜானி ஜனார்த்தன்" எனும் பெயரில் ரீ மேக் செய்யப்பட்டு அங்கும் வெற்றி கொடி பறந்தது. குறிப்பாய் செந்தாமரைக்கும் ரஜினிக்கும் முட்டிக் கொள்ளும் காட்சிகள் தியேட்டரின் ஏகோபித்த ஆதரவு பெற்றது.

14. ஸ்ரீராகவேந்திரர் - 01.09.1985

சூப்பர் ஸ்டார் ரஜினி அவர்களின் 100வது படம்.... திரைப்படங்களில் நடிக்க தொடங்கியவுடனே மனதில் முடிவு செய்து வைத்திருந்தாராம்,.. இந்த வேடத்தை 100வது படத்தில் ஏற்பது.... குருநாதர் பேனரில் நடிப்பது என்று... அதற்காகவே, கே.பாலசந்தர் அவர்கள், எஸ்.பி.முத்துராமன் அவர்களிடம் சொல்லி, இந்த படத்தை டைரக்ட் செய்ய சொன்னதான எஸ்.பி.முத்துராமன் அவர்கள் ஒரு மேடையில் கூறினார்... கவிதாலயா தயாரிப்பு... எஸ்.பி.முத்துராமன் டைரக்‌ஷன்... அருமையான இசை இளையராஜா... “அழைக்கிறான் மாதவன், ஆநிரை மேய்ப்பவன்”, ”ஆடல் கலையே தேவன் தந்தது”, தேடினேன் தேவ தேவா. தாமரை பாதமே” போன்ற இனிமையான பாடல்கள் நிறைந்த மந்த்ராலய மகான் அவர்களின் காவியம் தமிழுக்கு கிடைத்தது...

15.படிக்காதவன் - 11.11.1985

கே.பி., எஸ்.பி.முத்துராமன் ஆகியோரை தொடர்ந்து ரஜினியின் அனைத்து பரிமாண நடிப்பை வெளிக்கொணர்ந்த மற்றொரு டைரக்டர் ராஜசேகர். இந்தியில் அமிதாப் பச்சன் நடித்த “குத்தார்” படத்தின் தமிழ் ரீமேக்... நடிப்பின் இமயமும் நடிகர் திலகம் சிவாஜி இவரும் சேர்ந்து கலக்கி, மிகப் பெரிய வெற்றி. குடும்பத்திற்காக உழைக்கும் அப்பாவியான டாக்சி டிரைவர், தம்பி சரியாக படிக்காமல், தீய வழியில் போவதை கண்டு வெம்பும் கதாபாத்திரத்தில் பின்னி இருப்பார்.. ஜோடி அம்பிகா.. 1985 தீபாவளிக்கு வெளியானது... இருவரின் நடிப்பும் வெகு பாந்தமாக வெளிப்பட்ட படமிது.. இளையராஜாவின் இசை பெரிதும் பேசப்பட்டது...” இத்தனை அப்பாவியா என நாகேஷ் கேட்கும் காமெடிகளில் கச்சிதம். தம்பிக்கு என பாசம் கொட்டி, தன் வாழ்க்கையை அர்பணித்து விட்டு தம்பி உதாசினம் செய்து விட வெறுத்து ஊரைத் தெரிஞ்சுகிட்டேன் என பாடும் போது இதயம் நனையும். காமெடி யதார்த்தம் என இரு துருவங்களையும் இணைத்த பிரமிப்பு. ”ஊரை தெரிஞ்சுக்கிட்டேன்”, “ராஜாவுக்கு ராஜா நான்டா” “சோடிக்கிளி எங்கே சொல்லு சொல்லு” , “ஒரு கூட்டு கிளியாக ஒரு தோப்பு குயிலாக” போன்ற சூப்பர் ஹிட் பாடல்கள் நிறைந்த படம்.

16. தளபதி - 05.11.1991

ஜி.வி.ஃபிலிம்ஸ் தயாரிப்பு...டைரக்டர் மணிரத்னம் அவர்களுடன் முதலில் இணையும் படம்.. இளையராஜாவின் அதிரடி சூப்பர் ஹிட் இசை, வாலியின் வைர வரிகளில் பட்டையை கிளப்பிய பாடல்கள்... இது “தளபதி” படத்திற்கு எதிர்பார்ப்பை எகிறவைத்த கூட்டணி..உயரிய இயக்கம், தேர்ந்த திரைக்கதை, குளு குளு ஒளிப்பதிவு என ரஜினியும் மம்முட்டியும் அதிரடியாய் நடித்தது. அரவிந்த்சாமி அறிமுகமான படம்..நட்பை கூட கற்பை போல் எண்ணுவேன் என கர்ணனாய் வாழும் கதாபாத்திரம்.மம்முட்டி ரஜினிக்கு இணையான படம் முழுதும் வந்து பாராட்டத்தக்க நடிப்பை தந்த படம்... ரஜினியின் பல பரிமாண நடிப்பை வெளிக்கொணர்ந்த படம்...

“ராக்கம்மா கைய தட்டு”, சுந்தரி கண்ணால் ஒரு சேதி”, காட்டுக்குயிலு மனசுக்குள்ள”, யமுனை ஆற்றிலே ஈர காற்றிலே”, ”சின்ன தாயவள் தந்த ராசாவே”, “மார்கழிதான் ஓடி போச்சு போகியாச்சு” என்று அனைத்து பாடல்களும் ஹிட் ஆன ஒரு படம் தான் “தளபதி”... 1991 ஆம் ஆண்டு தீபாவளி ரிலீஸ்... வெற்றி பெற்ற படம்..

17.மன்னன் - 14.01.1992

பி.வாசு.இயக்கத்தில், சிவாஜி ப்ரொடக்‌ஷன்ஸ் தயாரித்த படம்... ரஜினியின் அனைத்து பரிமாண நடிப்பும் வெளிப்பட்ட ஒரு படம்.. காதல், சோகம், அன்பு, பாசம், வீரம் என்று அனைத்து துறைகளிலும் ரஜினி சிக்ஸர் அடித்திருப்பார்... தாயை மதிப்பதில் மன்னன், சண்டி ராணியான மனைவி அடக்குவதில் மன்னாதி மன்னன். இளையராஜாவின் இசை பெரிதும் பேசப்பட்டது.. அதிலும் கவிஞர் வாலி எழுதி, கே.ஜே.யேசுதாஸ் பாடிய “அம்மா என்றழைக்காத உயிரில்லையே” பாடல் சூப்பர் டூப்பர் ஹிட்... (இந்த பாடலை கல்வெட்டில் செதுக்கி வைத்துள்ளார் யேசுதாஸ் அவர்கள் தான் கட்டிய ஒரு கோயிலில்..) அம்மா என்றழைக்காத பாடலில் தன் தாயை நினைக்காத தமிழனே இல்லை என சொல்ல வைத்த பாடல். அடங்காத திமிர் பிடித்த பெண்ணாக விஜயசாந்தி ரஜினியுடன் போட்டி போட்டு நடித்து இருப்பார்... கவுண்டருடன் டிக்கிட்டு கவுண்டரில் அடிக்கும் லூட்டி எக்கச்சக்கம்.

18. அண்ணாமலை - 27.06.1992

ஆக்ரோஷமான ரஜினியை வெளிக்கொணர்ந்த, டைரக்டர் சுரேஷ் கிருஷ்ணா டைரக்ட் செய்த படம்.. தேவாவின் பட்டையை கிளப்பிய இசை, கலகல திரைக்கதை, உணர்வு பூர்வமான நடிப்பு என சுரேஷ் கிருஷ்ணாவின் இயக்கத்தில் செம தூள்.கே.பாலசந்தர் அவர்களின் கவிதாலயா தயாரிப்பாக வந்தது..

முதலில் டைரக்டர் வசந்த் இயக்குவதாக இருந்து, சுரேஷ் கிருஷ்ணாவிற்கு வாய்ப்பு வந்தது..

இசையமைப்பாளர் தேவா முதன் முதலாம ரஜினி படத்திற்கு இசையமைத்த படம்... “கொண்டையில் தாழம்பூ” , “ரெக்க கட்டி பறக்குதடி அண்ணாமலை சைக்கிள்”, வந்தேண்டா பால் காரன் அடடா, பசு மாட்ட பத்தி பாடப்போறேன்” (ரஜினியின் அட்டகாசமான அறிமுக பாடல்), “ஒரு பெண்புறா” போன்ற இனிமையான பாடல்கள் நிறைந்த மாபெரும் வெற்றிப்படம்.. என்னை சூப்பர் ஸ்டார் ஆக்கியதில் முக்கிய பங்காற்றிய படம் என்று ரஜினியே சொன்ன படம் இது.

19.பாட்ஷா - 12.01.1995

சாந்தமான வம்புச் சண்டை எதற்கும் போகாத ஆட்டோக்காரன் என வலம் வந்து இடைவேளை வேளையில் ஆக்ரோஷமான அடிதடி ஆள் என உருமாறி அதகளப்படுத்தும் அற்புதமான நடிப்பு.

எழுத்தாளர் பாலகுமாரன் ரஜினிக்காக எழுதிய மறக்க முடியாத பஞ்ச் டயலாக் “ நான் ஒரு தடவ சொன்னா, நூறு தடவ சொன்ன மாதிரி” மிடுக்காக அமைந்த படம்.

இதிலும், இசையமைப்பாளர் தேவாவின் இசை பெரிதும் பேசப்பட்டது... “ நான் ஆட்டோக்காரன்” (அட்டகாச அறிமுகப்பாடல்), “தங்க மகன் இங்கு சிங்க நடை போட்டு”, “ அழகு, நீ நடந்தால் நடை அழகு” (இது ரஜினியின் தசாவதார பாடல்..... இந்த பாடலில் 10 அவதாரம் எடுத்து இருப்பார்), “ரா ரா ரா ராமையா” (இது சித்தர் சொல்லிய வாழ்க்கை தத்துவத்தை அடிப்படையாக வைத்து கவிப்பேரரசு வைரமுத்து எழுதிய பாடல்) என்று தேவாவின் இசை ராஜாங்கம் நடந்த படம் இது...

ரஜினி ரசிகர்களுக்கு ஃபுல் மீல்ஸ் கொடுத்து, அதன் பின்னர் போட்டுக்கோ என ஸ்வீட் பீடாவும் கொடுத்தது மாதிரி முழு திருப்தி தந்த படம். படம் மெகா ஹிட் என்பதை சொல்லவும் வேண்டுமோ?

20.சிவாஜி - 15.06.2007

பழம்பெரும் தயாரிப்பு நிறுவனமான ஏ.வி.எம். சுமார் 60 கோடி பட்ஜெட்டில் தயாரித்த இந்தியாவின் மிக மிக பிரம்மாண்டமான படம்.. இங்கிலாந்தின் பாக்ஸ் ஆஃபீஸ் யூ.கே.டாப்-10ல், 9வது இடம் பிடித்து, யூ.கே.டாப்-10 படங்களில் நுழைந்த முதல் தமிழ் படம் என்ற பெருமை பெற்றது... ஜூன் 2007ல் வெளிவந்த “சிவாஜி” செய்த சாதனை, இன்று (ஃபிப்ரவரி 2010) வரை முறியடிக்கப்படாமலேயே உள்ளது...... இந்திய படங்கள் என்றாலே பாலிவுட்டின் ஹிந்தி படங்கள் தான் என்று நினைத்திருந்த சர்வதேச திரைப்பட சந்தைக்கு, தமிழ் (கோலிவுட்) என்று ஒரு மார்க்கெட் உள்ளது என்பதை எடுத்துக்காட்டிய படம்..சர்வதேச சந்தைக்கு தமிழ் படத்தை கொண்டு சென்று, நினைத்துப் பார்க்க முடியாத வருவாயை ஈட்டி, தமிழ் படத்தை தரம் உயர்த்திய மைல்கல்.

இன்றைய தலைமுறையை ரசிக்க வைத்து அதிரடி, ஸ்டைல் என கலர்ஃபுல் கலக்கல். ரஜினி இன்னும் இவ்வளவு இளமையா, அழகா என ஆச்சர்யப்படவைத்த அற்புதம். ரஜினி-ஷங்கர்-ஏ.ஆர்.ரஹ்மான் கூட்டணி உலக அளவிலான வசூலில் மிக பெரிய சாதனை படைத்த படம்.... ஏ.ஆர்.ரஹ்மானின் இசை பெரிதும் பேசப்பட்ட படம்...

அவரது திரைப் பயணத்தில் மைல் கல்லாய், வெற்றியின் படிகளாய் அமைந்த டாப் 20 படங்களை பட்டியலிட்டு அதன் சிறப்பம்சங்களையும் ஒரு வரியிட்டு எழுதியது இந்த பதிவு.

மொத்தமுள்ள 150கும் மேற்பட்ட ஒரு பட்டியலில் 20ஐ மட்டும் தேர்ந்தெடுத்து தொடுப்பது, மிகவும் சிரமமாக இருந்ததே அவர் வெற்றியின் ரகசியம்.

பட்டியல் இட்டதில் விடுபட்ட பல நல்ல திரைப்படங்கள் தங்கள் மனதில் நிச்சயம் தோன்றும், அவை நிச்சயம் ரஜினியின் மணிமகுடத்தில் மின்னும் வைரங்களே.


வணக்கம்

தோழமைகள் தங்களுக்கு பிடித்த படங்களின் பட்டியலை பின்னூட்டத்தில் சொல்லுங்களேன்.

சூப்பர் ஸ்டாரின் அதிரடி 20:20 – (பாகம்-2)

6. தப்புத் தாளங்கள் - 30.10.1978

இன்று இருக்கும் எந்த ஒரு பெரிய கதாநாயகரும் ஏற்க தயங்கும் ஒரு வித்தியாசமான ரவுடி கதாபாத்திரம்... வாழ்வது ஒரு விலைமாதுவுடன்.... சட்ட மீறல்களை அனாயாசமாய் செய்து கரவொலி வாங்கிய படம். சின்ன பட்ஜெட், கருப்பு வெள்ளை படம்... கமல் ஒரு சிறு கதாபாத்திரத்தில் நடித்திருப்பார்... கே.பாலசந்தர் டைரக்ட் செய்த படம்... நடிகை சரிதா அறிமுகமான படம்...

7. நினைத்தாலே இனிக்கும் - 14.04.1979

ஒரு ஆக்ரோஷமான அதிரடியான ஆக்‌ஷன் ஹீரோ என அங்கிகரிக்கப்பட்ட சூப்பர் ஸ்டார் காமெடியில் இந்த அளவு கலக்குவாரா என ஆச்சர்யப்பட வைத்த படம். அதையும் கண்டுபிடித்தவர் அவரின் குரு நாதரே. தீபக் என்ற கதாபாத்திரத்தில், கண்ணில் பார்த்ததையெல்லாம் லவட்டும், கையில் டேப்பை வைத்து கனவுக் கன்னியை தேடும், சுண்டு விரலா, டொயோட்டா காரா என்று “பூர்ணம் விஸ்வநாதன் கேட்கும் கேள்விக்கு திணறல் போன்ற காட்சிகள் என அதிரடி அக்மார்க் நகைச்சுவை காட்சிகள் நிறைந்த ரகம்.

அதுவும், உங்க தாடி எனக்கு ரொம்ப பிடிச்சுருக்கு என்று கீதா கூறும்போது, இந்தா எடுத்துக்கோ என்று தன் ஃப்ரெஞ்ச் தாடியை கழற்றி கொடுத்தல் என்று பளீர் நகைச்சுவையை அள்ளி தெளித்திருப்பார் டைரக்டர் பாலசந்தர்.... இது ஒரு இன்னிசை மழை என்று விளம்பரப்படுத்தியது போல், படத்தின் அனைத்து பாடல்களும் தேன் விருந்து...

“எங்கேயும் எப்போதும்”, “சம்போ சிவசம்போ (இசையமைப்பாளர் எம்.எஸ்.விஸ்வநாதன் பாடியது), “யாதும் ஊரே யாவரும் கேளிர்”, நம்ம ஊரு சிங்காரி சிங்கப்பூரு வந்தாளாம்”, இனிமை நிறைந்த உலகம் இருக்கு”, பாரதி கண்ணம்மா நீயடி சின்னம்மா, ஆனந்த தாண்டவமோ தாண்டவனார் ஆடுகின்றார்” போன்ற தேனினும் இனிய பாடல்கள் நிறைந்த நிஜமான “இசை மழை”யே இந்த படம்...

8. ஆறிலிருந்து அறுபது வரை - 14.09.1979

தன் குடும்பத்திற்காக தன்னையே உருக்கிக்கொள்ளும் மூத்த அண்ணன் கதாபாத்திரம்... உருக்கமான பல காட்சிகள் நிறைந்தது.. தம்பியாக எல்.ஐ.சி.நரசிம்மன் நடித்து இருப்பார்...உயிர் நண்பனாக “சோ” அவர்கள் நடித்த படம்.. “கண்மணியே காதல் என்பது கற்பனையோ, காவியமோ” என்ற இனிய பாடல் உள்ள படம்... இசை இளையராஜா... மற்றுமொரு பஞ்சு அருணாசலம், எஸ்.பி.முத்துராமன், ரஜினிகாந்த் கூட்டணி இணைந்து தந்த மாபெரும் வெற்றிப்படம்...

9. ஜானி - 15.08.1980
ஜானி என்ற நெகடிவ் கதாபாத்திரம் (கூட சுருளிராஜன் சாமிகண்ணுவுடன் இணையும் காட்சிகளில் படு லூட்டி...), வித்யாசாகர் என்ற முடி வெட்டும் சலூன் வைத்திருப்பவர் என்று இரு வேடங்களில் நடித்து இருப்பார்... இரு வேடங்களுக்கும் வித்தியாசம் காட்டும் வகையில் காட்சிகளை டைரக்டர் மகேந்திரன் அமைத்து இருப்பார்... ஒருவர் ஸ்ரீதேவியுடன் இணைந்து பல உருக்கமான காட்சிகள் நடித்து இருப்பார்.. அந்த பக்கம், தீபாவுடனான காட்சிகள் காமெடியாக இருக்கும்... இளையராஜாவின் இசையில் “காற்றில் உந்தன் கீதம்”, “என் வானிலே ஒரே வெண்ணிலா” போன்ற இனிமையான பாடல்கள் ஒலித்தன....

10.முரட்டுக்காளை - 20.12.1980

மக்கள் திலகம் எம்.ஜி.ஆர் அவர்கள் நடிப்பில் தயாரிக்கப்பட்ட அன்பே வா

படத்தின் தயாரிப்பிற்கு பின், நீண்ட இடைவெளி விட்ட பொன்விழா கண்ட மாபெரும் தயாரிப்பு நிறுவனம் ஏ.வி.எம்.அவர்களின் பிரம்மாண்ட தயாரிப்பில் வெளிவந்து வெள்ளி விழா கண்ட படம்... இந்த படத்திலும் இளையராஜா அவர்களின் இன்னிசையில் “பொதுவாக எம்மனசு தங்கம்”, “மாமன் மச்சான், ஏய்.. நீ தானே ஆச வச்சான்”, “எந்த பூவிலும் வாசமுண்டு” போன்ற சூப்பர் ஹிட் பாடல்கள் நிறைந்த படம்.. இன்று பார்த்தாலும் தொய்வின்றி ரசிக்கக்கூடிய ஒரு படம் இது... ரயில் சண்டைக்காட்சி பெரிதும் பேசப்பட்டது... “சீவிடுவேன்” என்ற டயலாக், அதற்கு ரஜினி காட்டும் மேனரிஸம் பாராட்டத்தக்க வகையில் இருக்கும்...

11.தில்லு முல்லு - 01.05.1981

நகைச்சுவை அதிரடி சரவெடி... ரஜினி - தேங்காய் சீனிவாசன் அட்டகாச காம்பினேஷன்... தேங்காய் அவர்களை ஏமாற்ற ரஜினி போடும் இரு வேடங்கள் வேடங்கள் (அய்யம்பேட்டை, அறிவுடைநம்பி, கலியபெருமாள் சந்திரன்...அய்யம்பேட்டை, அறிவுடைநம்பி, கலியபெருமாள் இந்திரன்), அதன் தொடர்பான காட்சிகள் படு சூப்பராக இருக்கும்... ஆபாசமற்ற ஒரு முழு நீள நகைச்சுவை படம்... மெல்லிசை மன்னர் எம்.எஸ்.விஸ்வநாதன் அவர்களின் இசையில் “ராகங்கள் பதினாறு உருவான வரலாறு” பாடல் சூப்பர் ஹிட்.. ஜோடியாக நடித்தவர் மாதவி... ரஜினியை வில்லனாகவே பார்த்த கே.பி.அவர்கள் நினைத்தாலே இனிக்கும் படத்திற்கு பிறகு ஒரு முழு நீள காமெடி ரோல் செய்ய வைத்த படம்...இந்த படம் தமிழில் வெளிவந்த நகைச்சுவை படங்களில் ஒரு “மைல்கல்” என்றால் அது மிகையல்ல.

(ஆர்.கோபி / லாரன்ஸ்)

(புகைப்படங்கள் உதவி : ரஜினிஃபேன்ஸ்.காம் மற்றும் பல இணைய தளங்கள்...)

சூப்பர் ஸ்டாரின் அதிரடி 20:20 - (பாகம்-1)

"சூப்பர் ஸ்டார் ரஜினிகாந்த்" என்றதுமே நம் எல்லோரின் மனத்திரையில் ஒரு "பாயும் புலி"யின் உருவம். நினைத்த மாத்திரத்திலேயே பரவசப் படுத்தும் பர்சனாலிட்டி. வேகம், சுறுசுறுப்பு, ஸ்டைல், திரையில் காட்டும் ஆளுமை, பெரும்பாலோரின் மனதை வசீகரித்த‌, கொள்ளை கொண்ட ஸ்டைலான நடிப்பு, என எல்லோரும் ரசிக்கும் திரை உலகின் வசூல் சக்ரவர்த்தி.

மொழி எனும் எல்லை கடந்து தமிழ், தெலுங்கு, மலையாளம், கன்னடம், ஹிந்தி, பெங்காலி (பாக்ய தேவதா... இதில் கமலஹாசன் அவர்களும் நடித்துள்ளார்) மற்றும் ஆங்கிலம் ("ப்ளட்ஸ்டோன்" என்ற ஒரு ஆங்கில படம்) உள்ளிட்ட 7 மொழி படங்களில் நடித்துள்ளார்.

இந்திய நாட்டின் எல்லையையும் கடந்து, தமிழ் படங்கள் எதுவும் பெரிதாக வரவேற்படையாத ஜப்பான் நாட்டில் அவர் நடித்த "முத்து" என்ற தமிழ் படம் 200 நாட்களுக்கு மேலாக பெரிய வசூலுடன் ஓடியதும், அதை தொடர்ந்து "சந்திரமுகி" படம் சக்கை போடு போட்டதும் கூட நம்மை வியப்படைய வைக்கும்.... ஜப்பானை தொடர்ந்து தென்னாப்பிரிக்காவில் ("சந்திரமுகி" நூறு நாட்கள், பின்னர் வசூலில் பட்டையை கிளப்பிய "சிவாஜி தி பாஸ்") ஐரோப்பாவில் என கண்டங்களை கடந்து வசீகரிக்கிறார்.

1975 ஆம் ஆண்டு, தனது திரைப் பயணத்தை, ஒரு மிக சிறிய (ஆனால் பவர்ஃபுல்லான) வேடத்தில் ”அபூர்வ ராகங்கள்” என்ற படத்தில் அறிமுகமாகி 1985 ஆம் வருடம் (அதாவது 10 வருடங்களுக்குள்) தன் 100வது படத்தை எட்டினார்... சூப்பர் ஸ்டார் அவர்களை அறிமுகம் செய்த இயக்குனர் சிகரம் கே.பாலசந்தர் ரஜினி அவர்களை ஒரு வில்லனாகவே பார்த்து, அது போன்ற வேடங்களையே கொடுத்து வந்தார். ஒரு நாள் தான் ஒரு பெரிய வில்லனாக வரவேண்டும் என்று ஆசி வழங்குங்கள் என்று ரஜினி அவர்கள் கே.பாலசந்தர் அவர்களிடம் கேட்ட போது, ஏன் வில்லனாக, நீ ஒரு பெரிய ஹீரோவாக வருவாய் எனச் சொன்ன வாய் முகூர்த்தம் இன்று நிதர்சனமானது.

அவரது திரைப் பயணத்தில் மைல் கல்லாய், வெற்றியின் படிகளாய் அமைந்த டாப் 20 படங்களை பட்டியலிட்டு அதன் சிறப்பம்சங்களையும் ஒரு வரியிட்டு இதோ ஒரு பதிவு. தற்போதைய கணக்கின்படி, ரஜினி அவர்கள் நடித்த 150-க்கும் மேற்பட்ட திரைப்படங்களின் தொகுப்பிலிருந்து வெறும் 20 படங்களை மட்டும் தேர்ந்தெடுத்து தொடுப்பது, மிகவும் சிரமமாக இருந்ததே ரஜினி அவர்களின் வெற்றியின் ரகசியம்.

பட்டியல் இட்டதில் விடுபட்ட பல நல்ல திரைப்படங்கள் தங்கள் மனதில் நிச்சயம் தோன்றும், அவை நிச்சயம் ரஜினியின் மணிமகுடத்தில் மின்னும் வைரங்களே.

1. மூன்று முடிச்சு - 22.10.1976

முக்கிய பாத்திரம், ஆனால் சற்றே முரண்பட்டதும் கூட, இது உனக்கு ஓகேதான் என்று கே.பி.அவர்கள் ரஜினியை வில்லனாக்கி ரசிக்க வைக்கும் நடிப்பு தந்தார்.. அவரது டீ.கே. ஒ.கே மிக பிரபலமாய் பேசப்பட்டது பட்த்தின் ஹைலைட். டைரக்டர் கே.பாலசந்தர்.அவர்கள் ரஜினியின் நடிப்பு மேல் வைத்த அந்த நம்பிக்கை தான், படத்தில் முழு நீள வேடத்தை பெற்று தந்தது.. ரஜினியும் தன் பங்குக்கு அட்டகாசமான “வில்லன்” நடிப்பை வாரி வழங்கி இருப்பார்... கமலுடன் போட்டி போடும் அந்த நடிப்பு பெரிதும் பாராட்டத்தக்கது....

2. புவனா ஒரு கேள்விக்குறி - 02.09.1977

வில்லனாகவே பார்க்கப்பட்ட ரஜினியை, ஒரு நேர் கதாபாத்திரத்திலும், பால் வடியும் முகத்துடன் நல்ல கதாபாத்திரங்களையே செய்து வந்த சிவகுமார் அவர்களை எதிர்மறையான வில்லன் வேடத்திலும் நடிக்க வைத்து பஞ்சு அருணாசலம், எஸ்.பி.முத்துராமன் கூட்டணி, விஷ பரீட்சை செய்த படம். ஆயினும், மக்கள் இருவரையும் ஏற்று கொண்டதில், படம் சூப்பர் ஹிட்... ”விழியிலே மலர்ந்தது” என்ற பாடல் சூப்பர் ஹிட்... இசை இளையராஜா...

3. 16 வயதினிலே - 15.09.1977

பரட்டை என பட்டையை கிளப்பிய நடிப்பு. சிறு வேடமே என்றாலும் ”இது எப்படி இருக்கு” என அவர் சொன்னதை நாம் ரசித்ததே பின்னர் பஞ்ச் டயலாக் எனும் பெயரில் விசுவரூபம் எடுத்தது. தியேட்டரிலிருந்து வெளிவந்த அனைவரும் சொன்ன டயலாக் “இது எப்படி இருக்கு”? இசை ராஜா இளையராஜாவின் கிராமிய இசையை பட்டி தொட்டி எங்கும் ரசிக்க வைத்தவர். தேசிய விருது பெற்ற எஸ்.ஜானகியின் இனிமையான குரலில் “செந்தூரப் பூவே செந்தூரப்பூவே ஜில்லென்ற காற்று” பாடல் காதில் இனிதாக கூவியது. ஸ்டுடியோவிற்குள் முடங்கிக் கிடந்த திரைப்பட குழுவை கிராமங்களின் வரப்புகளில் நடக்க வைத்த இயற்கையை அறிமுகமாக்கிய அறிமுக இயக்குனர் பாரதிராஜாவின் கை வண்ணம்.

4. இளமை ஊஞ்சலாடுகிறது - 09.06.1978

டைரக்டர் ஸ்ரீதர் - கமல்ஹாசன் - ரஜினிகாந்தின் வெற்றிக் கூட்டணி. கமலுக்கு இணையான முழு படத்தில் வரும் கதாபாத்திரம்... இந்த அளவு விட்டு கொடுத்தது கமல் அவர்களின் பெருந்தன்மை என்று ரஜினியே சொன்ன படம்... பாடல்கள் மெகா ஹிட்.. நண்பனாய் பின்னர் கூடப்பிறந்தவனாய் பழகியவன் தனக்கே துரோகம் செய்கிறானோ என வெகுண்டு எழுந்து, பின்னர் நிலை அறிந்து தியாகம் செய்யும் ஒரு ஸ்டைல் கேரக்டர். பேனா நீட்டி கையெழுத்திடும் ஸ்டைல் தியேட்டரின் கிளாப்ஸை அள்ளியது. பாடல்கள் அனைத்தும் முத்துக்கள்.

5. முள்ளும் மலரும் - 15.08.1978

பிரபல எழுத்தாளர் “ரமணி சந்திரன்” அவர்கள் எழுதிய நாவல் தான் “முள்ளும் மலரும்” என்று வண்ணத்திரையில் திரைப்படமாய் விரிந்தது... ரஜினி அவர்களின் பாராட்டத்தக்க குணசித்திர நடிப்பு வெளிப்பட்ட படம்..

தங்கையின் மேல் அதீத பாசம் வைத்திருக்கும் அண்ணன் - தங்கை கதை... பாசமலருக்கு இணையாக சொல்லப்பட்டது... படத்தை தயாரித்த வேணு செட்டியார் மறுத்த ஒரு பாடல், கமல் அவர்களின் தலையீட்டால், ஷூட் செய்யப்பட்டு, படத்தில் இடம் பெற்றது. அந்த பாடலே.... ”செந்தாழம்பூவில் வந்தாடும் தென்றல்” என்ற சூப்பர் ஹிட் பாடல்.. இளையராஜாவின் இசை பாலு மகேந்திரா ஒளிப்பதிவு என பெரிதும் பேசப்பட்ட படம்... மகேந்திரன் டைரக்‌ஷனில் யதார்த்தமான படம்...

(ஆர்.கோபி / லாரன்ஸ்)

(ஒரு சிறு குறிப்பு : சூப்பர் ஸ்டார் ரஜினிகாந்த் அவர்கள் 1977 ஆம் ஆண்டு 15 படங்களிலும், 1978 ஆம் ஆண்டு 20௦ படங்களிலும் நடித்திருந்தார்... )

இன்னும் வரும்...............